قومی احتساب بیورو ( نیب) نے وزیراعظم عمران خان کے مشیر برائے پارلیمانی امور بابر اعوان کے خلاف کرپشن ریفرنس دائر کردیا ہے ۔
نیب کے مطابق بابر اعوان سمیت دیگر افراد کے خلاف کرپشن ریفرنس دائر کیا گیا ہے ۔ملزمان پر نندی پور منصوبے میںتاخیر کرنے پر ریفرنس بنایا گیا ہے ۔
نیب کے مطابق بابر اعوان کے ساتھ ریفرنس میں سابق وزیراعظم و وزیر پانی و بجلی راجا پرویز اشرف،سابق سیکریٹری قانون مسعود چشتی ،جسٹس (ر) ریاض کیانی ،سابق ریسرچ کنسلٹنٹ شمائلہ محمود،سابق سینئر سیکریٹری ڈاکٹر ریاض محموداور سابق سیکریٹری پانی وبجلی شاہد رفیع بھی ملزمان کی فہرست میں شامل ہیں۔
نیب کے مطابق سپریم کورٹ کے حکم پر2011 میں نندی پور کمیشن قائم کیا گیا تھا، کمیشن کی سربراہی رحمت حسین جعفری کو دی گئی تھی اور کمیشن کو نندی پور منصوبے کی تاخیر کی وجوہات جاننےکی ذمہ داری سونپی گئی تھی۔
نیب حکام نے بتایا کہ اقتصادی رابطہ کمیٹی نے نندی پور پاور پروجیکٹ کی منظوری دی تھی، منصوبے کی منظوری 329 ملین ڈالر کی لاگت سے دی گئی اور منظوری کے بعد منصوبے کا کنٹریکٹ 28 جنوری 2008 کو کیا گیا۔کنٹریکٹ نادرن پاور جنریشن اورڈانگ فینگ الیکٹرک کارپوریشن چائنا کے درمیان ہوا جبکہ منصوبے کی تاخیر سے 27292.94 ملین روپے کا نقصان ہوا۔
دوسری جانب ریفرنس دائر ہونے پر رد عمل میں بابر اعوان نے کہا کہ 2007 کے مشرف کے وزیر قانون کے دور میں نندی پور منصوبہ آیا، 2012 میں منصوبہ کابینہ سے منظور ہوا، میری وزارت کے 16ماہ میں نہ کوئی سمری آئی اور نہ روکی گئی۔
بابر اعوان نے کہا کہ رحمت جعفری کمیشن نے میرا نام لیا، الزام دیا اور نہ ہی مجھے بلایا گیا، میرے خلاف تمام کارروائی 2 کالی بھیڑوں نے سیاسی مخالفت پر کی، تھوڑی دیر میں ثبوت دکھاؤں گا۔
کوئی تبصرے نہیں:
ایک تبصرہ شائع کریں