احتساب عدالت نے سابق وزیرِ اعظم نواز شریف اور سابق صدر آصف علی زرداری کو طلب کرلیا۔
جعلی اکاؤنٹس کیس میں پیش رفت ہوئی ہے، توشہ خانہ ریفرنس کی سماعت کرتے ہوئے احتساب عدالت نے نواز شریف اور آصف علی زرداری کو طلب کیا ہے۔
عدالت کی جانب سے سابق وزیرِ اعظم اور پاکستان پیپلز پارٹی کے رہنما یوسف رضا گیلانی کو بھی توشہ خانہ ریفرنس میں 29 مئی کو طلب کیا گیا ہے۔
قومی احتساب بیورو (نیب) نے عدالت میں مؤقف اختیار کیا ہے کہ آصف زرداری اور نواز شریف نے یوسف رضا گیلانی سے غیر قانونی طور پر گاڑیاں حاصل کیں۔
نیب کا کہنا ہے کہ آصف زرداری نے گاڑیوں کی صرف 15 فیصد ادائیگی جعلی اکاؤنٹس کے ذریعے کی، لیبیا اور یو اے ای سے بھی آصف زرداری کو بطور صدر گاڑیاں تحفے میں ملیں۔
نیب کا کہنا ہے کہ سابق صدر آصف زرداری نے گاڑیاں توشہ خانے میں جمع کرانے کے بجائے خود استعمال کیں۔
نیب نے کہا ہے کہ نواز شریف 2008ء میں کسی بھی عہدے پر نہیں تھے، انہیں 2008ء میں بغیر کوئی درخواست دیئے توشہ خانے سے گاڑی دی گئی۔
نیب کے مطابق گاڑیوں کی ادائیگی عبدالغنی مجید نے جعلی اکاؤنٹس سے کی، انور مجید نے انصاری شوگر ملز کے اکاؤنٹس سے 2 کروڑ روپے سے زائد کی غیر قانونی ٹرانزیکشنز کیں۔
نیب کا مزید کہنا ہے کہ انور مجید نے آصف زرداری کے اکاؤنٹس میں بھی 9 اعشاریہ 2 ملین روپے ٹرانسفر کیے، عبدالغنی مجید نے 37 ملین روپے کسٹم کلیکٹر اسلام آباد کو ٹرانسفر کیے۔
قومی احتساب بیورو کا یہ بھی کہنا ہے کہ ملزمان نیب آرڈیننس کی سیکشن 9 اے کی ذیلی دفعہ 2، 4، 7 اور 12 کے تحت کرپشن کے مرتکب ہوئے۔
