نوازشریف کا نعم البدل بھی نوازشریف ہی ہے،کلثوم نواز کی موت نے نوازشریف کو ہلایا ضرور ہے مگر نوازشریف کا حوصلہ ہم سب کی سوچ سے بھی زیادہ ہے

لاہور (16ستمبر 2018ء) معروف کالم نگار حذیفہ رحمان کا اپنے حالیہ کالم " پاکستانی سیاست اور نواز شریف "میں کہنا ہے کہ کچھ ایسے حادثے بھی زندگی میں ہوتے ہیں کہ انسان بچ تو جاتا ہے مگر زندہ نہیں رہتا۔شاید مرحومہ کلثوم نواز صاحبہ کی موت بھی نوازشریف کے لئے ایسا ہی حادثہ ہے۔۔نواز شریف کے لئے اب کھونے کو زنجیر ںہیں اور پانے کو سارا جہاں ہے۔

جیل سے عبوری رہائی کے بعد سوشل میڈیا پر مقبول ہونے والی تصویر میں مسلم لیگ نکے قائد نوازشریف خاصے کمزور اور ٹوٹے ہوئے نظر آرہے تھے۔ظاہر ہے 47سالہ رفاقت کوئی کم نہیں ہوتی۔میں نے ذاتی طور پر پہلی مرتبہ نوازشریف کو کمزور ہوتے دیکھا تھا۔مگرنوازشریف سنبھل چکے ہیں۔بہت بڑا حادثہ تھا مگر فولادی اعصاب کا مالک نوازشریف اس میں بھی نہیں گرا۔

یہ بھی ضرور پڑھیں :ایپل نے آئی فون کے 2 نئے اور جدید ماڈل متعارف کروا دیے

 

واقعی نوازشریف بہت بہادر ہے مگر کمزوروں کے لشکر میں ہے۔کلثوم نوازکی جدائی کے غم کے بعد نوازشریف اگر سنبھل سکتا ہے تو نوازشریف سے کچھ بھی توقع لگائی جاسکتی ہے۔شاید میں نے اپنی زندگی میں اتنے مضبوط اعصاب اور اللہ پر بھروسہ کرنے والا شخص نہیں دیکھا۔۔نوازشریف سنبھل چکا ہے۔۔کلثوم نواز کی موت نے نوازشریف کو ہلایا ضرور ہے مگر نوازشریف کا حوصلہ ہم سب کی سوچ سے بھی زیادہ ہے۔

انتہائی دکھ اور تکلیف کے باوجود جنازہ گاہ میں خود گاڑی چلا کر آنا ،ایک واضح پیغام تھا کہ میں اب بھی فرنٹ سے لیڈ کروں گا۔۔نواز شریف کو ملکی سیاست سے مائنس کرنا اب تقریباََ ناممکن ہوچکا ہے۔۔نوازشریف کا نعم البدل بھی نوازشریف ہی ہے۔آج سے چند سال قبل کسی نے لکھا تھا کہ نوازشریف گوال منڈی کا وہ نوجوان ہے جو اپنی قسمت خود لکھ کر پیدا ہوا ہے، نوازشریف کی قسمت اس کے اپنے ہاتھ میں ہے۔وقت کے ساتھ ساتھ یہ سچ ثابت ہورہا ہے۔