مولانا فضل الرحمان نے اعتزاز احسن کے حق میں دستبردار ہونے پر مشروط آمادگی ظاہر کردی

اسلام آباد(03ستمبر 2018ء) :مولانا فضل الرحمان نے اعتزاز احسن کے حق میں دستبردار ہونے پر مشروط آمادگی ظاہر کردی۔ مولانا فضل الرحمان کے فیصلے کے بعد اعتزاز احسن کے متفقہ امیدوار بننے کے امکانات روشن ہو گئے۔تفصیلات کے مطابق موجودہ سیاسی صورتحال میں صداری انتخابات پاکستانی سیاست کا ہاٹ ایشو بن چکے ہیں۔۔پاکستان تحریک انصاف نے عارف علوی کو اپنا صدارتی امیدوار نامزد کیا ہے جبکہ اپوزیشن کی جانب سے متفقہ امیدوار سامنے نہیں لایا جاسکا۔

اس ساری صورتحال کے بعد مسلم لیگ ن کی جانب سے مولانا فضل الرحمان کو صدارتی امیدوار نامزد کیا گیا ہے جبکہ پاکستان پیپلز پارٹی کی جانب سے اعتزاز احسن کو صدارتی امیدوار نامزد کیا گیا ہے۔بنیادی طور پر اعتزاز احسن کا نام بطور صدر ہی متحدہ اپوزیشن میں پھوٹ کا باعث بنا۔

مسلم لیگ ن نے اعتزاز احسن کے نام پر اتفاق کرنے سے انکار کردیا اور سینیٹر پرویز رشید کی جانب سے مطالبہ کیا گیا کہ اگر اعتزاز احسن ،،نواز شریف نے معافی مانگ لیں تو انکو قبول کیا جاسکتا ہے ۔

دوسری جانب تحریک انصاف نے عارف علوی کو اپنا صدارتی امیدوار نامزد کیا ہے۔متحدہ اپوزیشن میں تنازعے کا فائدہ پاکستان تحریک انصاف کو ہوا ہے۔تاہم اب تازہ ترین صورتحال کے مطابق تحریک انصاف کے لیے خطرے کی گھنٹی بج چکی ہے۔مولانا فضل الرحمان نے اعتزاز احسن کے حق میں دستبردار ہونے کا عندیہ دے دیا۔تازہ ترین خبر کے مطابق پاکستان پیپلزپارٹی کے شریک چیئرمین آصف علی زرداری اور ایم ایم اے کے سربراہ مولانا فضل الرحمان کے درمیانصدارتی الیکشن سے پہلے ہونے والی انتہائی اہم ملاقات ہوئی۔

آصف زرداری صدارتی الیکشن کے لیے اعتزاز احسن کے نام پر ڈٹ گئے ہیں جب کہ مولانا فضل الرحمان پیپلز پارٹی کی قیادت کے فیصلے سے شہباز شریف کو آگاہ کریں گے۔تاہم مولانا فضل الرحمان نے اعتزاز احسن کے حق میں دستبردار ہونے کا عندیہ دے دیا،اس معاملے پر مولانا فضل الرحمان فوری شہباز شریفسے رابطہ کریں گے اور معاملے کو آگے بڑھانے کی کوشش کریں گے۔یاد رہے کہ مولانا فضل الرحمان کے دستبردار ہو جانے کے بعد اعتزاز احسن کے متفقہ امیدوار ہونے کے امکانات روشن ہو گئے ہیں۔