شیخ رشید کے بیانات سے ابہام پیدا ہوا،ایسی ریلوے آپ کے حوالے کی جس کی آپ نے سفر کی فخریہ ویڈیو اپ لوڈ کی،یہ سارا نظام انہی کی مرہون منت ہے،
سابق وزیرریلوے خواجہ سعد رفیق کا ردعمل
لاہور(25 اگست 2018ء) سابق وفاقی وزیرریلوے خواجہ سعد رفیقنے وزیرریلوے شیخ رشید کے نام پیغام بھیجا ہے کہ شیخ رشید صاحب!ایسی ریلوے آپ کے حوالے کی جس کی آپ نے سفر کی فخریہ ویڈیو اپ لوڈ کی،یہ سارا نظام انہی کی مرہون منت ہے،،خواجہ سعد رفیق نے مزید کہا کہ ریلوے نیب زدہ ادارہ نہیں، یہ کیسز پرانے ہیں، شیخ رشید کے بیانات سے ابہام پیدا ہوا۔
تفصیلات کے مطابق سابق وزیرریلوے خواجہ سعد رفیق نے اپنے پیغام میں کہا کہ ریلوے کی بہتری کے لیے وزیر ریلوے کی کامیابی ضروری ہے اور ہم چاہتے ہیں کہ سوا سو برس کے بعدریلوے میں شروع ہونے والا اصلاحات کا عمل پایہ تکمیل تک پہنچے کہ قومی اداروں کی بحالی اور بہتری پوری قوم کے مفاد میں ہے۔ انہوں نے کہا کہ یہ امر بھی واضح کرنا ضروری ہے کہ ریلوے کو ہمارے دور میں سیاست سے پاک رکھا گیا۔
بھرتی، ٹرانسفرز سمیت تمام معاملات میں کوئی سفارش قبول نہیں کی گئی جس کی گواہی وزراء، ارکان اسمبلی سمیت تمام سے لی جاسکتی ہے۔ خواجہ سعد رفیقنے کہا کہ ہمارے دور میں پاکستان ریلوے میں ایک بھی سنگل بڈ ٹینڈر قبول نہیں کیا گیا اس سلسلے میں واضح ہدایات اور پالیسی موجود ہے اور تمام ٹینڈرز کو منسوخ کر دیا گیا جن میں صرف ایک کمپنی نےحصہ لیا۔
انہوں نے کہا کہ پاکستان ریلوے نے سٹیٹ آف دی آرٹ امریکی کمپیوٹرائزڈ انجن خریدے جو ریلوے کے ’’کماؤ پوت‘‘ ہیں۔انکی خریداری قواعدوضوابط کے مطابق کی گئی،تاہم پاکستان ریلوے کا موازنہ فی الحال ہندوستان سےنہیں کیا جا سکتا۔ وہاں ریلوے کی ترقی کا عمل35 برس پہلے شروع ہوگیا تھا۔ وہاں لوکو موٹیوزکی پروڈکشن مقامی سطح پرہوتی ہے۔ یہ واضح کرنا بھی ضروری ہے کہ پاکستان ریلوے کا اس برس خسارہ 37.40ارب رہا اس خسارے کو27ارب تک لے جایا گیا مگر تنخواہوں، پینشنوں کے بقایاجات کے اضافی بوجھ کی وجہ سے گزشتہ برس10ارب کے اضافی اخراجات ہوئے۔
کوئی تبصرے نہیں:
ایک تبصرہ شائع کریں