سانحہ ساہیوال ، سی ٹی ڈی نے خلیل کے اہل خانہ کی بے گناہی تسلیم کر لی

  خلیل ، اس کی اہلیہ اور بیٹی کی ہلاکت انتہائی بد قسمتی تھی۔ سی ٹی ڈی ترجمان  

ساہیوال ( 20 جنوری 2019ء) : سی ٹی ڈی نے سانحہساہیوال میں ہلاک ہونے والے خلیل کی بے گناہی تسلیم کر لی ، تفصیلات کے مطابق واقعہ کی ویڈیو منظر عام پر آنے کے بعد ترجمان سی ٹی ڈی کی جانب سے ایک وضاحتی پیغام جاری کیا گیا جس میں ترجمان نے ذیشان کو دہشتگرد قرار دیتے ہوئے کہا کہ واقعہ میں خلیل، اس کی اہلیہ اور اس کی بیٹی کی ہلاکت انتہائی بدقسمتی تھی۔

ضرور پڑھیں: سپیل انڈسٹریل روبوٹ سسٹم نصب کرنے والا پہلا پاکستانی گروپ بن گی

جے آئی ٹی واقعہ کی تحقیقات کر رہی ہے۔ جس اہلکار کی غلطی ثابت ہوئی اس کے خلاف کارروائی کی جائے گی۔ سانحہ ساہیوال کی ویڈیو منظرعام پر آنے کے بعد انسداد دہشتگردی فورس کی جانب سے جاری وضاحتی بیان میں سانحہ ساہیوال میں ہلاک ہونے والوں میں سے ذیشان نامی شخص کو دہشتگرد قرار دے دیا ۔ ترجمان سی ٹی ڈی نے کہا کہ ذیشان اس گاڑی میں موجود واحد دہشتگرد تھا۔

گاڑی کالعدم تنظیم داعش کے زیر استعمال رہی۔ ترجمان نے کہا کہ تھریٹ الرٹ موصول ہوا کہ 20 تاریخ کو دہشتگرد حساس ادارے کے دفتر کو نشانہ بنانا چاہتے ہیں۔تھریٹ الرٹ کے بعد سی ٹی ڈی نے حساس ادارے کے ساتھ مشترکہ آپریشن کیا۔ ذیشان کی گاڑی کے شیشیے کالے تھے لہٰذا پیچھے بیٹھے ہوئے افراد نظر نہیں آرہے تھے۔ واقعہ میں خلیل ، اس کی اہلیہ اور بیٹی کی ہلاکت انتہائی بد قسمتی تھی۔

ذیشان کا ٹاسک جنوبی پنجاب تک بارودی مواد پہنچانا تھا۔ ذیشان نے جان کر خلیل کے خاندان کو لفٹ دی۔ خلیل کے خاندان کو ذیشان کے عزائم ، گاڑیکے دہشتگردوں کے زیر استعمال رہنے کا علم نہیں تھا۔ گاڑی پر سی ٹی ڈی اور حساس ادارے کی مشترکہ نگرانی پہلے سے جاری تھی۔ سیف سٹی اتھارٹی کے کیمروں نے گاڑی کو ساہیوال جاتے ہوئے دیکھا اور نشاندہی کی۔

ضرور پڑھیں: ساہیوال میں سی ٹی ڈی کی جانب سے قتل پر وزیر اطلاعات پنجاب فیاض الحسن چوہان کا شرمناک ترین بیان

سیف سٹی اتھارٹی کی اطلاع پر ساہیوال کی ٹیم کو گاڑی روکنے کا ٹاسک سونپا گیا۔ گاڑی روکنے پر ذیشان اور گاڑی کو فالو کرتے ہوئے موٹرسائیکل سواروں کی جانب سے ٹیم پر فائرنگ کی گئی۔ سی ٹی ڈی کی جانب سے خلیل کے اہل خانہ کی بے گناہی کو تسلیم کیا جانا سی ٹی ڈی اور پولیس کی نا اہلی کو ثابت کرتا ہے۔ عوام کا کہنا ہے کہ غلطی مان لینے سے خلیل ، اس کی اہلیہ اور اس کی بیٹی واپس نہیں آسکتے۔ سانحہ ساہیوال پر عوام نے ذمہ داران کو سخت سزائیں دینے اور عبرت کا نشانہ بنانے کا مطالبہ کیا ہے۔