اسلام آباد ۔ : وفاقی وزیر ہوا بازی غلام سرور خان نے کہا ہے کہ حکومت پاکستان نے مسافروں کو درپیش مشکلات کے پیش نظر ملک کے بڑے شہروں کے درمیان محدود فضائی آپریشن بحال کرنے کا فیصلہ کیا ہے۔ جمعہ کو ’’اے پی پی‘‘ سے گفتگو کرتے ہوئے انہوں نے کہا کہ فضائی آپریشن ملک کے 5 بڑے ہوائی اڈوں تک محدود ہو گا جن میں اسلام آباد، کراچی، لاہور، پشاور اور کوئٹہ شامل ہیں، علاقائی فضائی آپریشن کا آغاز 16 مئی 2020ن سے ہو گا۔
وفاقی وزیر برائے ہوا بازی غلام سرور خان نے پارلیمنٹ کے اجلاس سے خطاب کرتے ہوئے کہا کہ ایوی ایشن ڈویژن نے ائیر لائنز کے عملے اور مسافروں کی حفاظت کے لیے جامع ایس او پیز مرتب کر دیئے ہیں اور اس سلسلے میں جراثیم کش اسپرے اور معاشرتی فاصلہ جیسے حفاظتی اقدامات پر عملدرآمد کو یقینی بنایا جائے گا. وفاقی وزیر نے کہا کہ ابتدائی طور پر پی آئی اے اور سیرین علاقائی پروازوں کا آغاز کریں گے۔
یہ بات اجاگر کی گئی ہے کہ علاقائی مسافروں اور چارٹرڈ فلائٹ آپریشن کے لیے مرتب کئے گئے ایس او پیز جن میں پرواز سے پہلے طیارے کو چراثیم کش اسپرے کرنا، مسافروں کے درمیان کم از کم ایک نشست کا فاصلہ رکھنا، ماسک پہننا اور ہینڈ سینی ٹائزر کے استعمال پر سختی سے عمل درآمد کروایا جائے گا۔ انہوں نے کہا کہ دوران پرواز کھانے پینے کی اشیا کی اجازت نہیں ہو گی۔
ایئر لائنز دوران پرواز کسی بھی طرح کی ہنگامی صورت حال سے نمٹنے کے لیے ہوائی جہاز میں ذاتی حفاظتی ساز و سامان رکھنے کی پابند ہوں گی۔ طیارے میں سوار ہونے سے پہلے ہر مسافر کو صحت کا اعلامیہ فارم پر کرنا ہوگا جس میں مسافر کی شناخت، گزشتہ دو ہفتوں کے دوران سفر کی معلومات، موجودہ صحت کی صورت حال اور ایس او پیز کی تعمیل کے اقدام شامل ہیں۔
تمام پانچوں ہوائی اڈوں پر مسافروں کی روانگی سے قبل اور آمد کے بعد تھرمل سکیننگ کے عمل سے گزرنا ہو گا، کسی بھی مسافر میں دوران سکیننگ کورونا وائرس کی علامات ظاہر ہونے یا جسمانی درجہ حرارت بڑھنے کی صورت میں صحت کا عملہ معائنہ کرے گا۔ ہوائی اڈوں پر مسافروں کے مابین میل جول پر پابندی عائد ہو گی جبکہ ڈرائیور پارکنگ ایریا میں گاڑی میں ہی سوار رہیں گے۔
بریفنگ ایریا سے آگے کسی پروٹوکول کی اجازت نہیں ہو گی۔ غلام سرور خان نے کہا کہ مسافروں کی روانگی اور آمد کے ہر مرحلے پر باقاعدگی سے معاشرتی فاصلہ برقرار رکھا جائے گا، پرواز سے قبل جہاز پر لادے جانے والے سامان اور بعدازاں اتارے جانے والے سامان پر باقاعدگی سے چراثیم کش اسپرے کیا جائے گا۔ یہاں یہ بات قابل ذکر ہے کہ محدود علاقائی پروازوں کی بحالی کا فیصلہ فیڈریٹنک یونٹس کی مشاورت سے کیا گیا ہے۔
کوئی تبصرے نہیں:
ایک تبصرہ شائع کریں